අරවින්දට ICC ඉහළම ගෞරව නාමය

හිටපු ශ්‍රී ලංකා ක්‍රිකට් ක්‍රීඩක අරවින්ද ද සිල්වා මහතා අන්තර් ජාතික ක්‍රිකට් කවුන්සිලය මගින් පිරිනමන Hall of Fame ගෞරව නාමයෙන් පිදුම් ලැබී ය.

ශ්‍රී ලංකාවෙන් බිහිවූ අග්‍රගණයේ ක්‍රිකට් ක්‍රීඩකයකු වන අරවින්ද ද සිල්වා 1996 ක්‍රිකට් ලෝක කුසලාන අවසන් තරගයේදී ඔස්ට්‍රේලියාවට එරෙහිව නොදැවී ශතකයක් රැස් කළේ ය.

ඔහු ශ්‍රී ලංකාව වෙනුවෙන් ටෙස්ට් තරග 93කදී රැස් කරගෙන ඇති ලකුණු සංඛ්‍යාව 6361කි. එක්දින තරග 308කදී ශ්‍රී ලංකාව නියෝජනය කළ අරවින්ද ද සිල්වා මහතා ලකුණු 9284 රැස් කරගෙන තිබේ.

ක්‍රිකට් ක්‍රීඩකයෙකු හෝ ක්‍රීඩිකාවක් සඳහා අන්තර් ජාතික ක්‍රිකට් කවුන්සිලය ප්‍රදානය කරන ඉහළම ගෞරව නාමය වන්නේ මෙයයි.

මේ අතර 2023 සඳහා එම විශේෂ ගෞරවය ඉන්දීය සුපිරි පිතිකරු විරේන්ද්‍ර ෂෙවාග් සහ ඉන්දීය කාන්තා කණ්ඩායමේ සිටි සුපිරි ක්‍රීඩිකාවක් වන ඩයනා එඩුල්ජි ට ලැබී ඇති බව ජාත්‍යන්තර ක්‍රිකට් කවුන්සිලය නිවේදනය කළේය.

ICC “Hall of Fame” ගෞරවය දිනාගත් පළමු ක්‍රීඩිකාව ලෙසද ඩයනා එඩුල්ජි වාර්තා පොතට එක්විය.