ඔස්ට්රේලියාවේ පසුගිය වසරේ පැවැති විස්සයි20 ලෝක කුසලාන තරගාවලිය අතරතුර ඔස්ට්රේලියානු ජාතික කාන්තාවකට ලිංගික අතවර සිදු කිරීමේ නඩු විභාගයෙන් නිදොස් කොට නිදහස් කරනු ලැබූ ශ්රී ලංකා පිලේ හිටපු ආරම්භක පිතිකරු ධනුෂ්ක ගුණතිලකට නඩු ගාස්තු ගෙවන ලෙස සිඩ්නි නුවර දිස්ත්රික් අධිකරණ විනිසුරු සාරා හගේට් චෝදනා ගොනු කළ පොලිසියට නියෝග කර ඇතැයි එරට මාධ්ය වාර්තා කළේය. පොලිසිය එම නඩුව ගොනු කළ අයුරු සහ මෙහෙයවූ අයුරු සාධාරණ නොවන බව විනිසුරුවරියගේ නිගමනය වී තිබේ.
සාරා හගේට් විනිසුරුවරිය මේ නියෝගය කර ඇත්තේ මාස 10කට වැඩි කාලයක් ඔස්ට්රේලියාවේ රඳවා තබා සිටි ධනුෂ්ක ගුණතිලක පසුගිය සැප්තැම්බර් මස අගභාගයේදී ස්ත්රී දූෂණ නඩුවෙන් නිදහස ලැබීමෙන් පසු ධනුෂ්ක විසින් නඩු ගාස්තු ඉල්ලා අධිකරණයට ඉදිරිපත් කරනු ලැබූ අයදුම්පත ඊයේ විභාගයට ගත් අවස්ථාවේදීය.
ධනුෂ්කගේ නඩු විභාගය සඳහා ප්රමාණවත් සහ සත්ය සාක්ෂි පසුබිම් කරමින් නඩු පැවැරීමට පැමිණිල්ල මෙහෙයවූ පොලිසියේ අභිචෝදකයා අසමත් වී ඇතැයි නිරීක්ෂණයට ලක් වූ බවත්, එවැනි තත්ත්වයක් තුළ නඩු පැවැරීමට පෙර සියලු සාක්ෂි සාධක ඇතිව එක්රැස්කරගත යුතුව තිබූ බවත් විනිසුරුවරිය වැඩිදුරටත් ප්රකාශ කර තිබේ.
ටින්ඩර් මිතුරු ඇසුර සඳහා වන වෙබ් අඩවිය ඔස්සේ හඳුනාගත් ඔස්ට්රේලියානු ජාතික කාන්තාව සමඟ ඇගේ නිවෙස තුළ ලිංගිකව හැසිරීමේදී ඇගේ අවසරයකින් තොරව ආරක්ෂිත කොපුව ඉවත් කළ බවට චෝදනා කරමින් මේ නඩුව පවරා තිබූ අතර, ප්රමාණවත් සාක්ෂිවලින් තොරව චෝදනා ගොනු කිරීම සම්බන්ධව පොලිසිය දැඩි විවේචනයට ලක් කළ බව ද වාර්තා වේ.
සිය අකමැත්ත පිට ආරක්ෂිත කොපුව ඉවත් කළ බව අදාළ කාන්තාව පොලිසියට දුන් පළමු ප්රකාශයෙන් සඳහන් වන බවත්, එම ප්රකාශයට ඇතුළත් නොවූ බරපතළ කරුණු මාස 6කට පසු නැවත පොලිසියට ලබා දුන් ප්රකාශයට ඇතුළත් කර ඇති බවත් තමාට නිරීක්ෂණ වූ බව විනිසුරුවරිය වැඩිදුරටත් ප්රකාශ කර ඇත.
ආක්රමණශීලි හෝ ශිෂ්ටසම්පන්න නොවන ආකාරයෙන් ලිංගිකව හැසිරීම, අවසරයකින් තොරව ආරක්ෂිත කොපුව ඉවත් කිරීම සම්බන්ධ චෝදනා ගොනු කිරීමේදී සාක්ෂියක් නොවන බවත්, පැමිණිලිකාරිනියගේ විශ්වාසනීයත්වය හා අවංකභාවය තහවුරු කිරීමටත් එය සාක්ෂියක් නොවන බවත් විනිසුරුවරිය සාරා හගේට් වැඩිදුරටත් සඳහන් කර තිබේ. ධනුෂ්කගේ නඩු විභාගයේ බොහෝ ගැටලු සහගත කරුණු ඇතුළත්ව තිබූ බවත් එම කරුණු ආරම්භයේ සිටම පැහැදිලිව පෙනෙන්නට තිබූ බවත් විනිසුරුවරිය අවධාරණය කර තිබේ.
ඒ අනුව ධනුෂ්කට සිය නඩු ගාස්තු ලබා ගැනීම සඳහා අවශ්ය සහතිකය නිකුත් කරන ලෙස සාරා හගේට් විනිසුරුවරිය නියෝග කර ඇතැයි එරට මාධ්ය වැඩිදුරටත් වාර්තා කළේය.
